Kapag Nagpupuyat Ba Pwede Ng Magka-Acne?

Madalas ka bang magpuyat sa gabi para tapusin ang mga palabas na teleserye sa t.v o di kaya nama’y may proyekto sa skul na nais mong tapusin o trabahong kailangan mong ihabol sa deadline? Alam ninyo bang ang labis na pagpupuyat ay maaaring ikadami ng iyong acne sa mukha?

Bagamat walang direktang paliwanag o ebidensya tungkol sa pag-uungnay ng pagpupuyat sa pagkakaroon ng acne. Mayroon namang mga indirektang paliwanag na kapag tayo ay nagpupuyat ay nagdudulot ito ng acne sa ating mukha.

Ayon sa Livestrong at Buzzle, na kapag tayo ay nagpupuyat ay nababawasan ang pagpapahinga ng ating katawan o pagre-rejuvenate at ito ay magdudulot sa atin ng labis na stress, pamamaga, pagtaas ng insulin resistance at depresyon.

Ang stress ay isang salik kung bakit tayo nagkakaroon ng acne. Ang labis na stress ay makapagpapasigla sa adrenal glands na responsableng nagdadala ng androgens. Ang paggugol ng mga hormones sa ating katawan ay nagbubunsod sa pagbubuo ng acne. Ang stress ay naka-aapekto rin sa immune system, na nakapagpapabagal sa paggaling ng iyong acne.

Ayon pa sa ulat ng Journal of Clinical Endocrinology and Metabolism na ang kakulangan sa pagtulog ay nakapagpapadami ng cytokines inflammatory. Alam natin na ang acne ay pamamaga sa ating pores, malinaw na sa pagdami ng cytokines sa katawan ay nakapagbubunsod lamang ng pamamaga.

Idagdag pa rito na ang kakulangan sa pagtulog ay nakapagpapataas din ng insulin resistance. Hinahayaan nito ang ating katawan na makapag-prodyus ng maraming insulin. Ito ay dahilan din para magkaroon ng produksyon ng sebum (oil) na siyang nagdudulot ng inflammation na makapagpapadami lang sa ating acne.

Ang pagpupuyat ay may epekto rin sa ating mental at emotional framework na nagdudulot ng depresyon. Ang depresyon ay nagdudulot sa atin ng negatibong pag-iisip na lubos na nakaapekto sa kondisyon ng ating katawan- ang pagkakaroon ng hindi magandang kalusugan ay naka-aapekto sa healing ability ng ating katawan. Nagbibigay naman ito ng negatibong epekto sa paghilom ng acne.

Sinasabi ngang walang direktang epekto ang pagpupuyat sa pagdami ng acne ngunit ang mga salik na hatid ng kulang sa pagtulog ang dahilan para mabuo ang mga ito sa ating mukha.

Labis ka bang nagpupuyat at problemado ka sa pagdami ng acne sa iyong mukha? Ang kaalamang ito ay isa ng paalala sa iyo.

Source: medicmagicdotnet