Debt Problem: Tips Para Di Mabaon Sa Utang

Debt Problem- Marami ang nagsasabing lalong nagiging mahirap ang buhay habang dumaraan ang panahon.Pero siyempre, marami ring magandang pagbabago ang nagaganap sa paligid natin. Pero nagbubulag-bulagan ang ilan sa atin sa mga ito. Puro na lang problema ang nakikita nila sa ating bansa at sa daigdig.

Tips on How to Avoid Debt Problem

Kahit noon pa man, nariyan na ang pesimismo sa mundo. Nagsimula ito sa ahas na siya mismong demonyo ng Hardin ng Eden. Nilinlang ng ahas si Eve na hindi sila magiging masaya kung hindi nila kakainin ang ipinagbabawal na prutas. Sa madaling sabi, nakumbinse sila ng ahas na magsaya habang pwede pa at ito ang simula ng totoong kalungkutan.

Ngayon, napakaraming problema sa pulitika na hindi naayos. Naglipana rin ang panlilinlang sa kalakalan ng mga bangko at pagpapautang. Parang hinihila pababa ng mga pulitiko ang ating bansa at ang mundo. Posibleng mawalan ng halaga ang ating pera sa hinaharap. Posibleng maglaho ang savings natin kung biglang magsara ang isang babgko. Posible ring mawala ang investment na nakalaan sa pag-aaral ng mga anak natin dahil sa isang stock market crash o dahil sa biglang pagbabago ng patakaran ng gobyerno. Kung ganito lang din naman...bakit pa tayo mag-aabala na mag-ipon at maghanda para sa kinabukasan? Mabuhay sa kasalukuyan. Pagkagastusan alinman ang gusto natin. Ipagsawalambahala natin ang kinabukasan.

Mali ang ganung pag-iisip! Ganun tumatakbo ang utak ng taong iresponsable. Kapag natutunan niya ang tama, saka niya malalaman na pagbabayaran niya lahat ng maling kagawian niya. Hindi maganda ang record niya sa bangko at credit card. Hindi naaprubahan ang car loan niya, home loan, at kahit anong uri ng loan. Magdurusa ang kanyang kawawang pamilya at mapipilitan ang kanyang pamilya na doblehin ang kayod para kumita ng mas malaki.

Sa totoo lang, may ibang paraan. May nabasa ako tungkol sa isang tao na nagpasyang "bitiwan ang pera". Nabubuhay siya sa pamamagitan ng mga tira-tira ng ibang tao. Namumulot siya ng mga bagay na puwede pa niyang pakinabangan. Nabubuhay siya para lang ipakita na puwede namang mabuhay kahit walang anong materyal na bagay. Sa madaling salita, isa siyang pulubi.

Kung ayaw natin maging pulubi, kailangan nating tignan ang ating bansa at ang buong mundo bilang isang kalahating baso na malapit nang mapuno at hindi isang baso na kalahati na lang mauubos na. Parehong kalahati lang ang laman ng baso, pero nagkakaiba lang ng pananaw kung mapupuno ba ito o mauubos na. Ang totoo, napakaraming oportunidad na ito. Kapag optimistiko tayo, hahanap tayo ng paraan para paunlarin ang ating buhay. At habang pinauunlad natin ang ating buhay, nakakatulong tayo sa ating maliit na paraan para lalong mapaunlad ang ating bansa.

Kung napagpasyahan mong maniwala na uunlad ang buhay, siguruhin na hindi ka magkakaroon ng malaki at walang silbing utang. Sundin din ang prinsipyo ng pag-iipon at pagpapalago ng iyong yaman.
Ang artikulo na ito ay pagaari n Francisco J. Colayco 
source: Bulgar "Easy Money" Column