Na-Caesarian-Mas Pwedeng Mamatay Sa Infection

Labis na kasiyahan ang dulot sa mga ina kapag sila ay nagdalang-tao. Siyam na buwan mang dadalhin ng isang ina ang sanggol sa sinapupunan at makaranas man ng hirap ng paglilihi o karamdaman ay titiisin ito ng isang mabuting ina para mailuwal lamang na normal ang sanggol sa kanyang sinapupunan. Ang ibang ina ay swerteng nakararanas ng normal na pagle-labor ngunit may mga ina ring kinakailangan o mas pinipili ang ma-Caesarian. Ngunit alam ninyo bang mas pwedeng mamatay sa impeksyon (infection) ang mga babaeng na-caesarian kaysa sa hindi? Alamin ang tungkol rito.

Sa isinagawang pag-aaral o research sa England ay lumalabas na ang panganganak ng caesarian delivery ay sinasabing mas posibleng delikado sa pagkakaroon ng nakamamatay na impeksyon kumpara sa iba pang uri ng operasyon sa mga babae.

Tinatayang 4 sa 10 nanay na nanganak ng caesarian section ay mabilis na nagde-develop ng infection sa kanilang katawan at mahigit  15,000 kababaihan sa England ang tinamaan o naging biktima nito.

Mula sa pagkukumpara, nasa 9.6 porsyento ng mga babae ang nasa panganib na magkaroon  ng impeksyon sa caesarian section kaysa sa mga babae na nagkaroon ng hysterectomy na nasa 6.6 porsyento lamang ang panganib.

Higit din itong inaalala ng mga eksperto dahil ang infection ay maituturing na seryosong problema sa bawat pasyente sa ospital na itinataya ring malaking pahirap sa katawan at nagbibigay din ng dagdag na gastos sa gamutan.

Ilan lamang sa mga dahilan kung bakit nagkakaroon ng impeksyon ang mga bagong panganak ay ang pagiging overweight, underage hanggang 20, gayndin ang pagsasagawa ng operation ng isang junior doctor lamang.

Base sa resulta ng kanilang research ay lumalabas ang statistic na mahigit 400 impeksyon ang nakukumpirma sa bawat  4,000 caesarian ng mga nanay bawat taon.

Kung makumpirma ang pagkakaroon o pagiging active ng impeksyon ay higit na kailangan nilang manatili pa ng mas matagal na araw sa ospital at kailangang tumanggap ng maraming uri ng gamot na may mataas na dosage para labanan ang impeksyon.

Samantalang, nasa 60 porsyento namang mas mapanganib sa impeksyon ang bagong panganak na mommy sa caesarian delivery kaysa sa mga may normal birth at mga pasyenteng nagpapagaling ng mga sugat matapos ang iba’t ibang operasyon.

Source: Bulgar credits to; Icee Reen Labareno