Ito ang ilang helpful tips para sa commuters ngayong tag-ulan para iwas abala o perwisyo sa biyahe.
Gustuhin o ayawan man natin, babagsak at babagsak ang ulan. Perhuwisyo kung maituturing ng ilan sa atin ang baha sa kalsada pero natural na 'yan at tiyak na sa mahabang usapan lamang ito mauuwi. Kaya imbes na ang ulan ang mag-adjust sa atin na tiyak naman ay imposibleng mangyari -- ang dapat na lang natin gawin ay maging handa sa atin paglalakbay, lalo na ang mga commuter na kailangan pang sumakay ng mga pampublikong sasakyan makarating lamang sa kanilang paroroonan.
- Laging magdala ng payong. Tulad ng paulit-ulit nating sinasabi, ang pagkakaroon ng payong sa iyong bag ay mas maigi kaysa sa wala. Hindi na mahalaga kung mumurahin ang payong na iyong gagamitin basta mayroon ka laging dala ay ayos na.
- Kanselahin ang lakad na hindi importante. Mayroong golden rule na dapat pakatandaan ngayong tag-ulan. "Huwag ka ng tumuloy kung wala ka namang rason para lumabas." Kung maaari, ipagpaliban mo na lang ang iyong lakad o gawain kapag masama ang panahon. Hindi naman naimbento ang salitang "rain check" para sa wala.
- Siguraduhing naka-charge ang cellphone. Bago ka umalis sa iyong tahanan, tsekin mo muna kung fully-charged ang iyong cellphone. Hindi mo kasi masasabi kung kailan ka maistranded o hindi. Ang isang text sa iyong pamilya, kaibigan o dyowa ay makatutulong upang mapawi ang kanilang pag-aalala kung sakaling hindi ka agad makauwi o kapag may nangyaring masama sa iyo.
- Iwasang dumaan o maglaro sa baha. Madali kang makakakuha ng sakit kapag inilubog mo ang iyong paa. Alam natin kung ano ang mayroon ang baha, sari-saring dumi, basura o kahit ihi ng daga ay present dito kaya dapat lang itong iwasan.
- Palaging magdala ng plastic bag. Bukod sa payong, ang isa sa dapat mong dalhin ay ang plastic bag. Kahit kasi nakapayong ka, kapag malakas ang ulan, tiyak mababasa ang laman ng iyong bag.
- Mag-tune-in sa AM Stations. Dahil commuter ka, pakiusapan mo ang driver ng bus o ng jeep na iyong sinasakyan na itutok ang kanyang radyo sa AM kung napakasama na talaga ng panahon. Updated kasi ang mga ito sa lagay ng panahon, traffic situation, lebel ng baha at mga daan na dapat mong iwasan.
- Manatili sa matataas na establisimyento. Tandaan mo, kung mas mataas, mas mabuti.Subukang manatili sa loob ng gusaling iyong pinapasukan o kaya naman ay sa MRT o LRT station. Sa pamamagitan nito, madali mong makikita ang iyong paligid at kasabay nito, ligtas ka sa baha at panganib sa kalsada.
- Iwasan ang maglakad kapag malakas ang hangin. Huwag labanan ang lakas ng hangin o kaya ay huwag kang dumaan sa open area dahil hindi mo alam kung may lilipad na kung anong bagay papunta sa iyo o mabagsakan ka ng puno o billboard.
- Magpalit ng damit kapag nabasa ng ulan. Kapag ikaw ay nabasa sa iyong pag-uwi, magpalit ka agad ng damit. Ang pagsusuot ng basang damit sa malamig na panahon ay maaaring maging sanhi ng sakit tulad ng ubo at sipon.
- Magbaon ng ekstrang damit at pagkain. Maglagay ng biskwit at t-shirt at short o three fourths sa bag upang kung sakaling ma stranded ka at least mayroon kang kakainin at maiiwasan mo pa ang magkasakit. Mabuti na ang laging handa. Kung may locker ka sa opisina o paaralan, iwanan mo na lamang ito roon. source: Bulgar column ni Nympha Miano Ong
Comments
Post a Comment